Auf guad münchnerisch

    Unerklärlich

    Da Omd hod sche ogfanga:
    mit seina Neuen zum Essen ganga.
    Da schene Sigi hod ned gspart
    und mit am Stern aufgwart.
    Noch Hummer, Schampus und Soufflé
    hoam zu eahm - auf an Kaffee.
    Den hod ma auf da Couch eignumma,
    d Hormone sann auf Touren kumma.
    Am End vo da Vaführungspistn
    gaabs an neier Strich in seiner Listn.

    Wollust und Gier dränga -
    und da Sigi - laßt oiss hänga!
    In da Vaführer-Zunft
    sigt a se zum Zwergal gschrumpft.
    Damit des ned zur Gwohnheit grodt,
    hoid a se Apotheker-Rat.

    Huat, Sonnabruin, an Mantelkrong
    bis über d Ohrn naufgschlong.
    Er wart, bis d Kunden weniger werdn,
    redt ganz leise, kaum zum hern:
    "I brauchat wos fia unten rum,
    damit i konn, oder kumm."
    D Vakäuferin frogt interessiert:
    "Sie kenna ned, aa wenn s pressiert?
    Wei s z hart is? Koa Problem,
    do konn i wos zum Obführn gebn".

    Da Sigi schluckt, fangt nomoi o:
    "Na, na - do liegts ned dro.
    Es is ned innen, ma konn s seng."
    D Vakäuferin denkt noch a weng:
    "Ach so? Koa Grund zum schama:
    Hämorrhiden-Soim, de ham ma."

    Unterm Huat rinnt da Schweiß
    auf immer neie Gleis.
    Oa Vasuach noch m andern
    laßt Arznein aufn Tresn wandern:
    Soibn, Tabletten, Tropfa, Saft,
    aber nix fia d Lendenkraft.

    Um des Gspui zum End zu führn,
    kafft a hoid an Tee fia d Niern.
    Nochdem d Erwartunga ned passn
    konn a zumindest de steh lassn.

    Wir nutzen Cookies auf unserer Website. Einige von ihnen sind essenziell für den Betrieb der Seite, während andere uns helfen, diese Website und die Nutzererfahrung zu verbessern (Tracking Cookies). Sie können selbst entscheiden, ob Sie die Cookies zulassen möchten. Bitte beachten Sie, dass bei einer Ablehnung womöglich nicht mehr alle Funktionalitäten der Seite zur Verfügung stehen.