Ma konn mir ned nochsong, dass i mir a Urteil buid, ohne dass i woaß, vo wos i red. Oiss konn ma ned ausprobiern, aber des hob i ausprobiert: Bonsaimöbe auf Freischankflächn.Oiso hob i ma des erstbeste Café mit Kindermöbe ausgsuacht fia mein Seibstvasuach: As Hihocka is gottseidank ohne Knirschen in de Knia ganga (ma is ja nimma de Jüngste), die i dann im Sitzen knapp unterm Kinn ghabt hob.
Warum i d' Haxn ned ausgstreckt hob? Wei i dann de Grenzmarkierung vo da Freischankfläch um Wadlläng überschritten und de Fuaßgänger ins Gehege kumma waar!
I hob ma dann an Kaffee und an Kuacha bsteit. Damit i an de auf dem Kindertisch hikumm, hob i d' Schuiter mit da Greifhand obsenka und as Kreiz seitlich vabiang miassn. I hob ja bloß de Hand hernemma kenna, de auf da Seitn vom Tisch war, weil da andern Hand warn meine Knia im Weg. Noch 'm dritten Blaubeerkuachastückl und seine farbigen Spuren auf meim Gwand hob i an Kuachateller auf de Knia obgsteit. Mei liawa, spitze Knia derfst do ned hom! Noch a hoibn Stund Kauerstellung habn meine Knia mit am stechatn Schmerz rebelliert - und d' Fiaß warn eigschlaffa. Vor meim geistigen Aug hod a Thrombose bliaht und desweng woit i den Seibstvasuach liawa obbrecha und zoihn.
Mittlerweile war in dem Kindermöbeland aber Hochbetrieb und mir hods graust vor dem Schauspui, des i am Publikum beim Aufsteh gebn kannt. Oiso bin i sitzn bliebn, bis a paar Gäst ganga sann. De mitleidigen Blick vo de vabliebna Leit, ois i mi aus meim Kindersitz quält hob, hob i mit a paar gspaßige Sätz übaspuit.
Weiche Erkenntnis hod des Ganze brocht? I woaß endlich, wos des Wort "Beugehaft" bedeit.
Theresia Schneizlinger is a waschechts Münchner "Gwachs". I kenn sie scho ewig lang und mog ihrn trockena Humor und sogar ihra Grantln. Sie steht mit manche moderne Sachan auf Kriagsfuaß, weil klar: "Friahra war fast oiss besser!" Aber sie is durchaus tolerant, solang jemand a anständiger Mensch is oder oana, der im Biergarten ned scho noch da zwoatn Mass unterm Tisch liegt. D' Schneizlinger nimmt koa Bladl vor'n Mund, wos ned jedm gfoit. Aber des is ihra wurscht, sie moant: "I sog ja nix, i moan ja bloß!" As Internet is ned so ihr Ding, oiso überdrog i ihre mit der Hand aufgschriebna Erlebnisse und Gedankn aus'm Oidog in den Blog. A Foto vo sich wui s' ned im Web, desweng is des Buidl mit KI gmacht; kummt ihra aber scho recht nah. Ab und zua daucht d' Schneizlinger aa in an Sketch vo mir auf; d' Erlaubnis vo ihra hob i natürli!